Indik Subakti ring Sang Hyang Pengardi
12
Ritatkala akeh pisan anake magrunyung ngrauhin Hyang Yesus kantos wenten sane batisne kajekjek,
irika raris Hyang Yesus ngawitin pengajahan Idane kapining para pengiring Idane.
Ida ngandika sekadi puniki,
“Parilaksanan anak Parisine sane mapi-mapi patut sekadi ragi sane ngranayang saluirin adonane kembang.
Waspada ja ragane kapining parilaksanan ipune punika.
2 Krana nenten wenten paindikan mengkeb sane nenten jagi kabeberang,
tur nenten wenten paindikan ilid sane nenten jagi kabukak.
3 Kenten pada,
napi sane baosang ragane di petenge jagi kapirengin ring galange,
tur napi sane baosang ragane kisi-kisi ring tengah kamare jagi kaortiang maideh-idehan.
4 “Tiang ngandika kapining para semeton!
Sampunang ja jejeh kapining manusa sane mresidayang ngamademang ragan ragane,
nanging nenten mresidayang ngamademang jiwatman ragane.
5 Tiang jagi ngorahang sira sane sapatutne jejehin ragane sami:
jejeh ja kapining Sang Hyang Pengardi!
Krana sasampune ngamademang ragan manusa,
Ida makuasa ngentungang jiwatmannyane ring kawah apine.
Tiang ngandikayang,
sujatine ragane musti jejeh kapining Ida kamanten.
6 “Boyake kedis perite sane limang ukud mresidayang katumbas nganggen kalih jinah logam kamanten?
Yadiastun kenten,
aukud ja kedis-kedise punika nenten banggianga olih Sang Hyang Pengardi.
7 Punika mawinan,
sampunang ja jejeh!
Krana ragane luihan kapining kedis-kedise punika.
Samaliha rambut ring sirah ragane sampun kapetek olih Sang Hyang Pengardi.
Punika buktine Ida rungu kapining ragane.
8 “Pengandikan Tiange puniki patut!
Sapa sira ja sane ngakuin Tiang ring arepan anake akeh,
Tiang,
Sang Putraning Manusaa,
jagi ngakuin ipun ring arepan para malekat Sang Hyang Pengardine.
9 Nanging sapa sira ja sane nenten ngakuin Tiang ring arepan anake akeh,
Tiang pada nenten ngakuin anake punika ring arepan para malekat Sang Hyang Pengardine.
10 Anake sane ngamaosang paindikan sane nungkasin Sang Putraning Manusa,
jagi kaampurayang.
Nanging anake sane nganistayang pakaryan Roh Sang Hyang Pengardi,
anake punika nenten jagi kaampurayang.
11 “Yening ragane kabakta ring bale wantilan agamane jagi kaadilin olih pemrentah lan penguasane,
sampunang ja sengsaya indik napi sane jagi baosang ragane tatkala mabela raga.
12 Krana tatkala ragane kaadilin,
Roh Sang Hyang Pengardi jagi ngicen piuning napi sapatutne baosang ragane.”
Anak Sugih Belog
13 Raris salah tunggal saking anake akeh punika matur ring Hyang Yesus,
“Guru,
nikain ja nyaman titiange mangda ngedum warisan sane wenten kapining titiang.”
14 Nanging Hyang Yesus nyaurin,
“Jero,
Tiang nenten ja prajuru utawi akim sane jagi mragatang prakaran jerone makakalih.”
15 Raris,
Hyang Yesus ngandika ring anake akeh sapuniki,
“Waspada ja lan majaga-jaga ja mangda nenten kantos ragane makejang ngancan loba.
Sawireh urip ragane nenten ja magantung tekening arta sane makacakan.”
16 Irika raris Hyang Yesus nyeritayang pengumpamian sekadi puniki,
“Wenten anak sugih madue tegal sane ngasilang akeh pisan.
17 Anak sugih punika mapineh ring manahnyane,
‘Suba tusing ada tongos kaanggon nyimpen asil tegal tiange.
Kenken jani carane?’
18 “Raris ipun mapineh malih,
‘Jani tiang ngelah daya:
glebeg-glebeg tiange lakar kauug lan ngae ane gedenan.
Ditu lantas kasimpen gandumeb makejang tur barang-barang tiange ane lenan.
19 Disubane keto,
tiang bakal ngomong di keneh tiange,
“Tiang aget!
Liu ngelah kasugihan ane tusing bakal telah kanti tiban-tibanan.
Mareren ja jani!
Madaar ja,
nginem ja,
lan maliang-liang jani!”’
20 “Nanging Sang Hyang Pengardi masabda kapining anake punika,
‘Wih,
anak belog!
Petenge jani jiwatman awake bakal kaambil.
Nyenke bakal makatang saluirin ane kapunduhang ento?’”
21 Malih Hyang Yesus negesin,
“Kenten penadosne yening anake munduhang kasugihan kaanggen deweknyane praragan nanging nenten ngutsahayang sugih ring ajeng Sang Hyang Pengardine.”
Sampunang ja Sengsaya Indik sane Kasaratang
22 Raris Hyang Yesus ngandika ring para sisian Idane sekadi puniki,
“Ento kranane tiang ngorahin ragane,
‘Eda ja sengsaya tekening idup - apa ane ragane daar,
utawi apa ane ragane anggon.’
23 Sujatine idupe luihan tekening dadaaran,
lan awake luihan tekening penganggo.
24 Tolih ja kenken ja idupne kedis-kedise ane tusing matataneman utawi manyi lan tusing perlu gudang utawi glebeg.
Nanging Sang Hyang Pengardi ngicen amah-amahan tekening kedis-kedise ento.
Sujatine ragane joh luihan tekening kedis-kedise ento.
25 “Apake gunane ragane sengsaya?
Krana ulian sengsayane tusing ja nyidang nglantangang tuuh buin adina.
26 Yening ragane tusing nyidang nglantangang tuuhe padidi,
ngudake sengsaya unduk ane lenan?
27 Tolih ja kenken ja bunga-bunga ane mentik di padange.
Bunga-bungane ento tusing magae lan tusing ngutsahayang kaasriane padidi.
Nanging tiang ngraos tekening ragane,
entik-entikan bungane ento asrian tekening penganggo luih Raja Salomo.
28 Lan padange ento,
jani mentik laut enggal layu tur kakutang di apine.
Yadiastun keto,
Sang Hyang Pengardi tetep mapaica kaasrian tekening entik-entikane ento.
Apa buin ragane!
Sang Hyang Pengardi jagi ngicen ragane penganggo,
wih ragane,
anak ane kuang pracaya!
29 “Ane jani,
eda ja sengsaya lan repot-repot tekening apa ane lakar daar utawi inem.
30 Krana saluirin ento kaalih olih bangsa-bangsa ane tusing Yahudi.
Nanging Sang Hyang Pengardi,
sane dados Ajin ragane,
uning ragane ngamerluang saluirin ento.
31 Ane jani utsahayang ja apanga ragane seken-seken nerima Sang Hyang Pengardi dados Rajan ragane;
tur saluirin ane ragane perluang lakar kicen.”
32 Raris Hyang Yesus ngandika ring para sisian Idane sapuniki,
“Eda ja jejeh yadiastun ragane ajak bedik tur lemet.
Krana Ajin ragane sweca dados Rajan ragane sane miara ragane.
33 Adep ja pagelahan ragane tur pipisne pakidihang ja sid anake tiwas.
Keto carane ragane mempen arta di swarga,
buka mempen pipis di celeng-celengane ane tusing bisa uug.
Artane di swarga tusing bisa ilang krana ngetnget tusing nyidang ngutgut lan maling tusing nyidang nyemak.
34 Krana dija ja artan ragane,
ditu masih keneh ragane.”
Pengayah Sane Siaga
35 Hyang Yesus malih ngandika kapining para sisian Idane sapuniki,
“Ragane musti buka para pengayah ane setata siaga ngayahin pamekelne.
Lampun para pengayahe ento setata ngendih.
36 Ia satya ngantiang pamekelne mulih uling pesta nganten.
Yening pamekele ento mulih tur nogdog korine,
ia enggal ngampakang korine.
37 Bagia ja para pengayah ane dapetanga siaga kapining pamekelne,
tatkala mulih.
Baos Tiange ene saja!
Sujatine,
pamekelne ento siaga ngayahin para pengayah ane satya.
Pamekele bakal nunden para pengayahe negak apanga madaar.
Tur pamekele misadya ngayahin para pengayahe ento.
38 Bagia ja para pengayahe ane dapetanga sedek siaga ngantiang pamekelne mulih,
yadiastun teka di tengah lemenge utawi das lemahe.
39 “Dingehang ja masih unduke ene!
Umpamane ane ngelahang umahe nawang jam kuda malinge teka,
ia bakal majaga apanga malinge tusing macelep ka tengah umahe.
40 Sapatutne ragane siaga,
buka ane ngelahang umahe ento,
krana Tiang,
Sang Putraning Manusa,
bakal teka ka gumine di dinane ane tusing tawang ragane.”
41 Irika raris I Petrus matur ring Hyang Yesus sapuniki,
“Ratu,
napike pengumpamian punika nuturin titiang sami utawi anake akeh?”
42 Raris Hyang Yesus nyaurin sekadi puniki,
“Nyenke pengayah ane satya lan wicaksana?
Ia bakal kaangkat olih pamekelne dadi pemimpin pengayah apanga ngicen ajengan tekening para pengayah makejang manut galahne.
43 Bagia ja pengayahe ento tatkala pamekelne mulih tur napetang ia sedek magae!
44 Baos Tiange ene saja!
Sujatine,
pamekelne ento bakal nunden pengayahne ngurusin makejang arta branannyane.
45 Nanging minab pengayahe ento mapineh kene,
‘Pamekel tiange buin mekelo lakar mulih!’
Ento mawinan ia nyagurin para pengayahe ane lenan saha madaar lan nginem kanti punyah.
46 Ditu lantas pamekele nadak teka di dinane ane tusing tawanga.
Lan pamekelne bakal ngukum keras pengayahe ento kanti das mati.
Lan pengayahe ento patuh dadine buka anake ane tusing satya kapining Sang Hyang Pengardi.
47 “Pengayah ane suba nawang keneh pamekelne,
nanging tusing siaga lan tusing nglaksanayang keneh pamekelne ento,
ia bakal keras katigtig.
48 Nanging pengayahe ane tusing nawang keneh pamekelne,
tur malaksana paundukan ane pelih,
ia bakal ingan katigtig.
Anake ane liu kicen pica,
liu bakal katuntut.
Tur anake ane liu kapracayain tanggung jawab,
liu bakal katuntut.”
Pakeweh Para Pengiring Hyang Yesuse
49 Hyang Yesus malih ngandika kapining para sisian Idane sapuniki,
“Tiang teka buka ngendihang api bakal ngadilin gumine ene.
Sujatine Tiang dot sajan api pengadilane ene suba ngendih.
50 Nanging satonden paundukane ento mamargi,
Tiang bakal nandang sengsara ane keweh sajan,
kanti manah Tiange sebet.
51 “Napike ragane ngaden Tiang teka ka gumine ngaba dame?
Tiang ngandikayang tekening ragane:
tusing!
Sapengrauh Tiange tusing ja ngranayang anake dame,
nanging saling matungkasan.
52 Nyumunin uling jani,
kaluarga ane limang diri bakal saling matungkasan,
telu nglawan dua utawi dua nglawan telu.
53 Bapa bakal nglawan pianak ane muani,
lan pianak ane muani bakal nglawan bapane.
Meme bakal nglawan pianak ane luh lan pianak ane luh bakal nglawan memene.
Keto masih matua ane luh bakal nglawan mantune ane luh lan mantune ane luh bakal nglawan matuane ane luh.”
Hyang Yesus Ngajahin indik Praciri Jaman
54 Hyang Yesus taler ngandika ring anake akeh sapuniki,
“Yening ragane nyingakin gulem menek saking badauh,
ragane gelis-gelis mabaos,
‘Sabeh jagi rauh.’
Tur yakti wenten sabeh.
55 Yening ragane ngrasayang angine rauh saking kelod,
ragane mabaos,
‘Jagi panes.’
Tur yakti panes.
56 Wih anak sane mapi-mapi patut!
Ragane mresidayang uning praciri langit lan gumine.
Ngudake ragane nenten uning napi sane jagi rauh tatkala ragane nyingakin napi sane mamargi ring jamane puniki?
57 “Ngudake ragane nenten nimbang napi sane patut?
Elingin ja ragane jagi gelis kaadilin.
58 Umpamine,
wenten anak sane nuntut ragane di pengadilan krana utang.
Utsahayang ja mragatang prakara utang ragane tatkala mamargi ka pengadilane punika.
Yening nenten pragat,
ragane jagi kapaksa kabakta ka arepan akime.
Raris ragane kaserahang sid jaksane,
tur kakrangkeng ring buine.
59 Pengandikan Tiange puniki patut!
Ragane nenten ja kabebasang saking buine sadereng ragane lunas naur utang.”